السلام عليكم ورحمه الله وبركاته بليز بدي استفسر عن شيء ضروري واتمنى الاقي الجواب الكافي عندكم؟
انا طالب منتسب ادارة اعمال في السنة التانية , الحكاية انو سددت مبلغ 3000 ريال عن طريق النت في خدمات بنك سامبا يوم الاربعاء 21 -09-1428 هـ لجامعة الملك عبدالعزيز على اساس انو الجدول الدراسي ينزل واقدر اسجل في الدورات التأهيلية الاولى في 15-10-1428هـ ولحد الان كل ما ادخل للصفحة الخاصة فيا احصل مكتوب لي طالب غير مسدد يعني لسه الجدول ما نزل ولا اقدر حتى اسجل في الدورات ؟ سؤالي: هل عملية التفعيل وتنزيل الجدول حتكون آلية يعني اليوم ولا بكره بالكتير يكون غير الحالة من طالب غير مسدد الى طالب مسدد
او انو انتظر لبعد العيد عشان تتفعل عملية الدفع والسؤال اللي محيرني اكتر اقدر اسجل في الدورات التأهيلية الاولى ولا حتروح عليا عشان عملية تفعيل الجدول اللي الى الوقت دا مكتوب لي الحالة طالب غير مسدد اتمنى عن جد احد يرود عليا في اسرع وقت لاني قاعد على اعصابي وشكرا جزيل لكم

الاخ الكريم المفروض انه يتم تعديل حالتك من طالب غير مسدد الى طالب مستمر.

وعادة يصل السداد خلال 48 ساعه الى 72 ساعه لكن ممكن عشان الاجازه او عشان الضغط ما تم تعديل حالتك.

عموماً احتفظ بإيصال السداد حتى تبدأ الدراسه واذا ما عدلوا لك حالتك الدراسيه لازم ترسله لهم فاكس (الايصال) او تروح تدويه بنفسك.

السلام عليكم ورحمه الله وبركاته شكرا جزيلا لك اخوي محمد التفعيل تم زي ما تفضلت وقولت عليه ما شاء الله عليك يا دوب شوفتك ردك ورجعت للصفحة الخاصة فيا وحصلت التفعيل تم والجدول نزل وقدرت اسجل في الدورات التأهيلية الله يخليك ويجزاك الف خير ومرة تانية اشكرك من اعماق قلبي

حياك حبيبي واي خدمه حاظرين

السلام عليكم ورحمه الله وبركاته اخوي محمد عندي استفسار بسيط عن مادة الرياضيات 130 ومادة الاحصاء 130 برضو انا درستها في السنة اللي راحت ودحينا في السنة دي اللي هيا تعتبر ليا السنة التانية معايا مادة التحليل الكمي 204السؤال هوا انو انا سمعت انهم حزفوا مادة الرياضيات 130 والاحصاء 130 وعوضوا عنها بمادة التحليل الكمي 204 والتحليل الاحصائي طيب زي انا دحينا كيف يعملو ليا معادلة لانو درست المادة اللي حزفوها بدالها يعني بالعربي ادرس التحليل الكمي 204 ولا اعتبر خلاص عديتو لانهم عوضوا فيه بالنسبة للمستجدين؟
والسؤال التاني في جدولي مادة اسمها مبادئ الاقتصاد (التحليل الجزئي) 101 بصراحة اشتريت الكتاب ومني عارف كيف ازاكر منو لانو مني فاهم اصلا هيا تتكلم عن ايه والكتاب هوا للدكتور ماجد بن عبدالله المنيف ياريت تقدر تفيدني بشيء او بملخصات ازا امكن وشكرا جزيلا لك عزيزي

اخي الكريم بالنسبه للماده اللي درستها وانتهت منها خلاص ما راح تدرسها ثاني وراح تحسب لك بالاسم والعدد اقصد عدد ساعاتها اما المواد اللي ما درستها وتم تعديلها في الخطه راح تدرس المواد اللي تقابلها يعني باختصار طالما انك انتهت منها راح تحسب لك .

وبالنسبه للاقتصاد 101 راجع قسم الملخصات وان شاء الله تستفيد منه.

http://www.ksau.info/vb/forumdisplay.php?f=77

ونسيت اقول لك مادة الاقتصاد 101 ممكن تكون معقده شويه بس مع شرح الدكتور راح تكون سهله ان شاء الله.