السلام عليكم


اعزائي الفكره اننا نضع في هذا الموضوع قصائد الشاعره عابرة السبيل


حتى يكون امام الجميع الفرصه للإطلاع على قصائد هذه الشاعره والإستمتاع بها


وسأبدا بقصديتها



العين بالعين




تدري حبيبي بطبعي حيل وتعرفه
العين بالعين والبادي هو الظالم

ماني ورا العاطفه بالحيل منجرفه
طبعي على صد ردات الفعل والم

الا خيانتك ما املك عندها صرفه
واحذر تحاتي ترى من خونتي سالم

مارضى اخونك ولا ارضى اعيش منحرفه
ماهو عشانك عشان النفس والعالم

درب الخيانات لو اموت ما اعرفه
لكن يا عمري تحاشى ثورة الحالم

موعد وفاتي

تعال بشـرح لـك أنـا كـل مغلـوق
تعـال شاهـدنـي مــع ذكريـاتـي

لا لا يغرك لبس موضـة ومسحـوق
انفض غبـار الوقـت تلقـي صفاتـي


قرب وطالع معّـن الشـوف بحـدوق
وزيف التطـور جـرده مـن حياتـي


بتشوف في وجهي من الماضي اطروق
أخذت من بطن الصحـاري صفاتـي


طفلـة بثـوب مخيطينـه ومفـتـوق
تنطـر جديـد الثـوب بالعيـد ياتـي


سمعت طرف اخبار عن كلمة السـوق
وتاخذ وتسـأل هـو وجـوده ثباتـي


طفلـه سحبهـا الوقـت للهم برفـوق
حتي انهـا صـارت مـن العاشقاتـي


وجار الزمن وعرض الحـب للعـوق
شـرق ركايبهـا وهــم مشمـلاتـي


واتلا عهدها فيـه يركـض ورا نـوق
مسرود جيب وفـي يدينـه عصاتـي



ويصد لكن يلتفـت لـي مـن الشـوق
عجـلان يلخصنـي بعيـنٍ تحـاتـي


وقفـي وخطواتـه يتـلـن معـلـوق
وخلانـي ماتنقـل عظامـي عبـاتـي


ودار الزمان ولا مشي الحظ بوفـوق
ومازلـت أخفـي بالظـلام اعبراتـي



ولا زلت أنا العب له علي كل طاروق
حتـي يجيـب الله مـوعـد وفـاتـي

الدموع

سالت دموعي و الجروح القديم
وهاج الضمير وبدل الافراح بالحزان

انا الذي عايش حياه ظليمه
ولاني بقادي من ورى حبك احسان

لجلك شربت المر وروحي سقيمه
وانت تجازيني على الحب حرمان


لا تجربون الحب والله جريمه
تلقى كلامي اخر الوقت قرآن

ليه السعاده تنكتب لي يتيمه
ليه الحزن مرسوم للقلب عنوان



لكن بنسى و اعتبرها هزيمه
تنزف جروحي وآخلا الحب نسيان

وصيتها على فراش الموت لزوجها




ترى الذبايح و أهلهـا مـا تسلينـي

أنا أدري إن المرض لا يمكن علاجه

أدري تبي راحتي لايا بعـد عينـي
حرام ما قصرت يديـك فـي حاجـه

أخـذ وصاتـي وأمانـه لا تبكينـي
لو كان لك خاطرٍ مـا ودي إزعاجـه

أبيك في يديك تشهدني وتسقينـي
أمانتـك لا يجـي جسمـي بثـلاجـه

لف الكفن في يديك وضف رجليني
ما غيرك أحدٍ كشف حسناه واحراجه

أبيك بالخيـر تذكرنـي وتطرينـي
يجيرني خالقـي مـن نـار وهاجـه

سامح على اللي جرى ما بينك وبيني
أيام نمشـي عـدل وأيـام منعاجـه

همي عيالي وأنا اللي فيْ كافينـي
علمهـم الديـن تفسيـره ومنهاجـه

مزاج




سمه دلع سمه غرور وعوابه
سمه مزاج يعشق اللي يناحيه

سمه قساوة قلب سمه صلابه
سمه لعانه سمه اللي تسميه

هذي طبوعي والغلا مو طلابه
يا نور عيني غير هالطبع ما فيه

مليت قلب يشتكي لي عذابه
وتصرفي دايم يذمه ويشكيه

ودايم على طبعي كثير عتابه
درب المذله يامنى النفس مابيه

مادام درب العيب ما جيب بابه
وعهد الوفا ما خنت روعة معانيه

ياكثر



يا كثر شعرٍ كتبته امس و البـارح
و يا كثر شعرٍ عقب فرقاه سجلتـه

دفاتري إمتلت من سبـة الجـارح
.هذا وغير الذي للحين ما قلته

خلى دموعي تهل و خاطري سارح
يا كثرٍ همٍ عليـه اليـوم شايلتـه

اللي خلاني انصدم واصيح واصارح
فرقـاه حتـى خيـالٍ مـا تخيلتـه

وا جرحي اللي من الافكار يستارح
وا قلبي اللي من الاوهـام حملتـه

يمه

يمه يايمه فديتـك لاتـخليني
بعثرني الهم وابغى يديك تجمعني

يــمه افهميني تراك ان مافهمتيني
مــافي شــخص بـهاالدنيا بيسمعني

ماعدت انا طفلتك كبرت شوفيني
خــليــك يمي ترى الاطماع تتبعني

لاتــدلــليني ابــي مــنك تــدليني
وابــي يــديــنك تداعبني وتصفعيني

لانــهــد حيــلي ابي عــطفك يقويني
ياما كــلامك على الشـدات شجـعني

وان جـــيتك ابكي ابي منك اتهديني
مابيــك تبكين ابغى العقل ينفعني

يامــملكة عــطف ياعطر الرياحيني
بــراثن الــهم والهوجاس تلسعني

بسمتك عندي الى من ضقت تكفيني
وارضاك عني عن الاحزان يرفعني

اســـمى العــلاقات تربط بينـك وبيني
ياللي احضانك ان ضاق الكون تاسعني

لــك احتــرامي وحبي والوفا فيني
وفـــيك اروع الحب مايخطي ويخدعني

غرامه


غرامه ربي في داخلي وانتشر بالحيل
من الصغر حبه في حشا النفس منغرسي

انا في نظر عيني حشا ماسمعت القيل
اهو حاضري ومستقبلي وباكري وامسي

جحدني مثل مايجحد الكافر التنزيل
فجعني مثل مايرمي بالي اللبسي

محبة ثمان سنين ضاعت بلا تحصيل
تصدق ختمها صاحبي يوم قال انسي

ختمها بصمت لاوداع ولاتعليل
ولازال جرحه داخل الروح مايبسي

تسرب طواري صاحبي مع ظلام الليل
تحرم عليه لامست الخلق ماامسي

عجوز مطلقه



انا عجوز مطلقة وام ورعان
وايضا مدام وبنت وانس وعانس

انا بدوية وعايشه عند حضران
وبنت البحر وابوي زارع وغارس

امية ماتعرف حروف والوان
وتلميذة دشت جميع المدارس

ظفره وخبله وعاقله في نقصان
شرود وانطح لي ثمانين فارس

خلون 00اعيش العابره دون عنوان
طيف يمر بلا رقابه وحارس

يعطيج العافية اختي بشاير على هالموضوع الخاص عن الشاعرة عابرة سبيل

عــــــابرة سبـــــيل

كانت الراحلة الشاعرة المعروفه عابرة سبيل تكتب شعرا جميلا خلف ستار
الاسم المستعار ولكن هنا سنذكر بياناتها الحقيقية بعد اعترافها وكذلك اشياء
لم نكن نعرفها واليكم

1\ اسمها الحقيقي وسميه العازمي( ام فهد ) من الكويت
2/ عمرها الحقيقي عند وفاتها43سنه
3/لديها اربع بنات وولدين
ولقد توفيت في تاريخ 18/ 3/ 2003م
الساعه العاشرة والنصف مساءا وقد ذكرعنهاانها انسانه طيبه جدا وهادئه وتكره الاعلام
والمفاجاة ان زوجها لم يكن يعلم بشاعريتها الا عندما اعترفت له بذلك اثناء مرضها

وزوجها هو من تولى طباعة ديوانها ورفظت
هي ان تستلم دينارا واحدا من مبيعاته وهذا دليل على روعه هالشاعر ة الطيبه رحمها الله

وهذه احى قصائدها

يسألوني عابـره ويـن الجديـد
والاجابـه ضايقـه فينـي ملـل

راحت ايام السعـاده والقصيـد
عشتها بيـن التكانـه والجهـل

كنت اروض شارد الحرف العنيد
ماعسرني لو بغيته فـي عجـل

فيه اصور لوعة الحـب الاكيـد
ومنّه(اشكل) ماحوى قلبي غـزل

ومعه (اسافر) عن معاناتي بعيد
ولأجل حبه ماشحنّي من زعـل

احضنه (فرحة) طفل في يوم عيد
واسكنه (روض) الخزاما والنفل

واحتويته ليت لي (قلب ٍ) بليـد
ماعرف (فرق) الجزاله والهـزل

والنهايه مابقـى عنـدي جديـد
واعذروني صارت ايامـي ملـل

عابرة سبيل




كل ما اتصل فيك.. صبح وليل تشكي لي
من عوج الاوضاع والدنيـا ومتاعبهـا

مليت يا صاحبـي مابيـك تحكـي لـي
هالأسطوانـه أنـا مليـت مطربـهـا

حتى خيالـك بتـال الليـل ياتـي لـي
جـروح وعيـون معقـوده حواجبهـا

عيشتنـي بعالـم ماهـو علـى جيلـي
زهـرة شبابـي حـرام انـك تخربهـا

يامـا هجرتـك ولا كملّـت ترحيـلـي
حبايـب ماتعـبـر عــن حبايبـهـا

حبيبتـك مـا تحـمّـل هالبهاذيـلـي
إضحـك معاهـا ولاطفهـا ولاعبـهـا

هيّـا تغـزل وغـن وزيـد تدليـلـي
البنـت ياحبـهـا لـلـي يداعبـهـا

قلي وش رايـك بفستانـي ومنديلـي؟
الوانهن تعجبك .. أو مانـت راغبهـا؟

وقلي وش رايك بعقدي مع خلاخيلـي؟
وشف قذلتـي يـوم قصينـا ذوايبهـا

وقلي وش رايـك بأطباعـي وأقاويلـي
لاحـظ عليهـا وغيّـرهـا وشطّبـهـا

خل بيننـا انقـاش وعلـوم وتعاليلـي
وآمر على البنت وان حبيـت طالبهـا

يامدمـن الهـم كافـي دمـع بالليلـي
بكره تشبـع مـن الدنيـا ومصايبهـا

دنيـاك والله .. ماتسـوى التزاعيلـي
حتـى ولاهيـب كفـو الـي يعاتبهـا

xxx نــــونxxx


هو يعرف أن القصايد خيالات وفنـون
xxx واقعي مافيه غيـره شريـك بدنيتـي

مالعبوا اهل المغازل عليه ويخسـون
xxx ماشيه في حشمةاللي مشى في حشمتي

من تربي مثلي فبيت عزٍ مايخـون
xxx غاليه بالحيل بالحيل عنـدي سمعتـي

ماسهرنـا بالليالـي ندقـدق تليفـون
xxx امحشوم اللي نواه الجليـل بقسمتـي

غالي لو هو يبي قصة العاتـق يمـون
xxx حجته تبقـى وتسقـط لعينـه حجتـي

هو نون وحطه المعتلي في وسط نون
xxx في يدينه دمعتي وفي يدينـه بسمتي


لعيــــونـه


جاني يقول : اسمعي لابد نتباعد
"""" ياخوك ماعاد به حل يريدونه

حسيت باحساس ماحسه معي واحد
"""" حسيت باحساس مدري كيف مضمونه

غربة سليمان وتلقائية مساعد
"""" وصرخة سلامه .. ونايف صقر بجنونه

ياهمي اللي معايه قايم وقاعد
"""" من وين مادرت وجهي قيل مديونه

لولاك ياحشمتي للوجه والساعد
"""" يمديني من قو غيضي صرت ملعونه

أقدر أغني وأدق طبول وأواعد
"""" لكني أرغب أقضي العمر مصيونه

أبسطها آخذ جوازي وأجحد الجاحد
"""" وآخذ شليلي بفمي وأقول : لعيونه

آخـذ الدفتـــر


كل ماقالو لفا الديره 000 غريب

xxxx قمت أومي في يديني وابتهل

هيه يالمقبل هلابك يالحبيـــب

xxxx مرحبا وأهليـــــن ياحي الرجل

وإن تــــبين لا صحيب ولا قريب

xxxx أبكي ضيقة أبكي حره وأنفشل

وأعتذر في صوت قطعه النحيب

xxxx العــذر والله رحل عنـــــي طفل

وأكتـــــب التاريـــخ وأوقع صليب

xxxx وآخذ الدفتر معايه 000 وانـــعزل




النــــاس



الناس سدّادة سلف يوم الرخا باكر يضيع
ما بي اسوي حاجة أصبح عليها نــــادمه

أبحث بقلب التجربه وآخذ من أحداث الجميع
عبره تساعدني على صدمات وقت قادمه

بعطي واسامح للبشر وأحسن مع الكل الصنيع
حتى إذا جار الزمن القى صديق انــــادمه

ودي على طول الزمن أكون منديل الفجيـع
أحب أعمّر ما أرتضي أكون لحظة نــــادمه

وما دمت أنا متعافيه وما زلت في سن الربيع
مهما يكن حجم العمل أرفض وجود الخادمه

وشلون يزعل




لا ما يجوز الزعل مابينه وبيني
............. وشلون يزعل وانا اللي شلت تقصيره

وانا على طريف لو ازعل ويرضيني
......................... ارضى قبل لايكمل معاذيره

جاك الخفوق بدوي يعتزي فيني
.................. يسوق لك من حلاله من مغاتيره

خلاص طوف خطاي ولاتبكيني
.............. وامسح خطايه بوجه الحب والجيره

ارضى وانا اي عذر منك يكفيني
................. ولاتطول السالفه يا مطول السيره

هذاك



هذاك لو قال الشتا صيف عرقت
.......................ولو قال صيفي برد شبيت ناري

هذاك لو قال الجمل طير صدقت
......................واقول ريشه بعثرته الصحاري

هذاك لو قال المطر جذب وافقت
.........................وادور الاعذار حق الخباري

هذاك لو قال القمر طاح صفقت
........................ واقول مللته كثير المساري

هذاك لو قال النظر عيب دنقت
................. يصير لي كف على اللمس ضاري

هذاك لو ينفي وجودي توهقت
..................... ما عاد ليه حل ...غير انتحاري

ومن قصائدها
بريال عارضته على السوق بريال
.................... من باعني برخيص والله لابيعه

من يشتري رجال قصر iiبالافعال
................... باع العهود الماضيه للخديعه

رجال يسوى له ثمانين iiرجال
................. كل الصفات اللي ملكها فضيعه

له ضحكةٍ تشبه لضحكات الاطفال
.................. ذيب ونظراته حنونه وديعه

وله فزعةٍ منها المجانين عقال
................ وفجوج لا ضاقت علي iiالوسيعه

ياما عدل عوجي ثقيلات وطوال
................. وانا معاقبته غيورِ iiصريعه

والله يسوى له ثمانين iiرجال
................. والخبل مثلي لا زعل يب يبيعه

لله ابــشــكــي (حــيــرتــي ) لله رب الـعـالـمــيــن
.........وامــد لــه كـفـي (دعـــا) يـــالله عـفــوك iiياجـلـيـل


يامنتـهـى (الشـكـوى) إلـــه العـابـديـن iiالصـابـريـن
...........يـالله (عونك0فزعتـك) همـي عـلـى قلـبـي iiثقـيـل


جتـنـي (رسـالـه) نصّـهـا ياعـابـره (حــزن iiوانـيــن)
..........مع(تجربه)مضمـونـهـا فـيــه الـنـتـايـج iiوالـحـصـيـل


في شكلها الظاهر (غطا) وفالباطن المعنى الدفين
...........وفـي (حبرهـا) تلميـح لايمكـن يصـيـر iiالمستحـيـل


وانــا حقيـقـه مـاعـرفـت شـلــون بـبــدى ياحـنـيـن
...........مــدري ابــديّ كلمـتـي أو الــزم الصـمـت iiالفضـيـل


لا جـيـت ابتكـلـم لقـيـت الـوضـع قـاسـي iiمايـلـيـن
............وان جيـت ابسكـت مالقـيـت عــلاج للقـلـب iiالعلـيـل


لاكـنّ (عزايـه) مامعـي سلطـه ولاعـنـدي iiضمـيـن
............ولااقــدر امـيّـل مـاعـدل ولاقـــدر اعـــدّل iiمايـمـيـل


مـاعـنـدي الاّ (كـلـمـة ٍ) فـيـهـا الـعــوارف iiخـابـريـن
..........الـقــاع لاصــــارت دهــــر (يـابـدو)يـازيـن iiالـرحـيــل


وخـلافـهـا (سـلامـتـج) والله عـلــى الـدنـيـا يـعـيـن
...........والـصـبـر عنـوانـه(فـرج) والـغـيـث لابـــده iiيـسـيــل


ويامنـتـهـى الـشـكـوى إلـــه الصـابـريـن العـابـديـن
........لاحـارت افكـاري تـرى مالـي ســواك انــت iiالدلـيـل

يا دنياي

جيت بكتب عن شقا عمري قصيده
............مير عيا القـول لا ياقـف معـي

شاف همـي والمعانـاة الشديـده
............أكبر من القول وحـروف النعـي

هاك يا دنياي عمري مـا أريـده
............إضربينـي واقسمينـي واجمعـي

أي نعم مانـي بهالدنيـا سعيـده
............من نهار ولادتـي وهمـي معـي

عشت محزونه وملتاعه وشريـده
............وياكبـر شـي تخبيـه اضلعـي

مابي بين الناس تبكين و وحيـده
............وان هجع طرف البشر ماتهجعـي

إما موتة حـق أو إيـدي بأيـده
............هيه..يارحمـة إلهي..أسـرعـي

الصدفة

مشيت بالزحمه مع الناس بالسـوق
.........ولا ادري من اللي طق كتفي iiبمسباح

أدرج النظرات مـن تحـت لا فـوق
..........وشهقت مثل اللي تواجه بالأشبـاح

غايب ثمان سنين والقلب محـروق
..........أتلى العهد بـه تـو ماشاربـه لاح

واليوم عندي ناحـل بيـن عـروق
..........وعوارض على اصفر الوجه واجراح

والله يا دمـع تحـدر مـن المـوق
..........إنه على الموطى من العين لا طـاح

يقولون لاتزعل من البعـد ياشـوق
..........وانا كما اللي قاضـي مـن جـراح

يعطيك العافيه بشاير والله ابيات حلوه من الشاعر عابرة سبيل الله يرحمها ويغفر لها وانتى كذلك وفيتي وكفيتي يابشور . هيك ولا بلاش بشاير . تحياتي مكلله بالورد والفل والريحان . , , , ,

الله يعطيك العافية بشاير


والله يرحم ويغفر للشاعرة عابرة سبيل



ولكم التحية

قصائد ملمسوس فيهـا روعة الإحساااس ..,,
وجماال المعنى الصااادق


شاعرة من أجمل شاعرات الخليج ...
رحمك الله ياعابرة السبيل .,’

مشكـورة إختـي بشاير على طرحك الرائع ..,,

دمتـي بخـير .,’

منقول بقلم الشاعره (حنين الشمال)...
يفتقد الإنسان أحيانا القدرة على التعبير خاصة في المواقف المؤلمة .. هذا هو حالي حتى حين أذهب لعزاء في قريب أجد أنني لا أستطيع مواساة أهل الفقيد كما يجب .. هو مقدار الحزن الذي يسكن في داخلي فما ألم بي من أحزان جعلني ألزم الصمت .. فما أحوجني لمن يواسيني في إنسانة كان فقدها بالنسبة لي مؤلما إنسانة ما كدت أن أعرفها حتى رحلت عنا رحلت عابرة سبيل .. هذا الاسم الشامخ في عالم الشعر النسائي ... قبل حوالي سبعة أشهر كنت أحادثها .. لم أكن أعرف أن هذا الحديث معها سيأتي يوم ويكون السبب في انهمار دموعي .. هذه الإنسانة الكبيرة التي صنعت من إحساسها تاريخا مشرفا تتناقله الأجيال .. كان حديثي معها حديثا لا ينسى .. فقد سألتني حين حادثتها هل أنتِ شاعرة فعرضت عليها قصائدي لتتحدث عن نفسها .. فكانت كلماتها مشجعة لي حيث قالت أنتِ يا حنين الشمال لكِ مستقبل رائع وقصائدك تدل على تمكنك .. كنت أتمنى أن أجري معها حوارا لكنها هي من أجرته معي فقالت لي هل تختارين قافية قصائدك قبل كتابة القصيدة ؟؟
فقلت لها لا الشعر بالنسبة لي حالة انفعالية لا أتصنعه والقصيدة تأتي في لحظة إحساس تحمل كل معانيها وقوافيها وأخيلتها لا خيار لي في ذلك ..
قالت إذا أنت تكتبين من واقع ؟
قلت لها واقع وخيال يندمجان فيخرج ما ترين ؟؟
قلت لها هل لي أن أجري معكِ حوارا ؟؟
قالت لي : يا حنين بودي ولكن أنا منقطعة عن الساحة وقد رفضت طلبات كثيرة وعديدة .
فقلت لها : أعلم أنكِ في غنى عن حوار تجريه معكِ صحفية مبتدئة فقد نلتِ من الشهرة ما يغنيك عن مثل هذا الحوار ولكن اعتبريه تشجيعا منكِ للأقلام النسائية ودعما لتواجدها في الصفحات الشعبية ..
قالت لي يا حنين : اعذريني والله انني لا أستطيع فلا يرضيك ِ أن يغضب مني كل من رفضت طلباتهم ولكن ما رأيك أن تكون بيننا ( ردية ) فقلت لها يشرفني ذلك ..
وكتبت لها قصيدتي التي مطلعها :

يا عابرة وأنت على قوس الاماني تمــــكثين
عشقك سبيل العابرات وحلم عابرة السبيل


وغابت عني عابرة سبيل حوالي شهرين بعد أن أرسلت لها قصيدتي حتى أنني يئست من ردها علي .. وفي يوم كنت ساهرة فوجدتها تدخل وكلمتني قالت حنين : ( تبين اعطيك القصيدة الحين ) ؟ فقلت لها : يا ليت .. ونسختها عندي فكانت فرحتي بها لا توصف .. لم أكن أعلم أنه سيأتي يوم وافتح ملفاتي واجد عباراتها باقية وهي راحلة عنا ..انهمرت دموعي وتمنيت أنني لم ألتقِ بها .. تمنيت أنني بقيت واحدة من جمهورها عن بعد .. لقد كانت قصيدتها التي ردت بها على قصيدتي آخر ما كتبت رحمها الله رحمة واسعة .. سألتها أن تسمح لي بمحادثتها هاتفيا ولكنها قالت :

خلون اعيش العابرة دون عنوان
طيفٍ يمر بلا رقابة وحـــــــارس

احترمت رغبتها في حينه , رحلت عابرة عنا ومازال البعض يردد أنها مجرد اسم ( وهمي) ولكن كيف تكون من تكتب هذه الأبيات اسما وهميا ؟!! إن شعرها وشعورها الذي بقي لنا لخير شاهد على أن هذا العطر أنثوي فيا الله كيف قلوب هؤلاء بل أين عقولهم لم يقنعهم شعرها فهل يقنعهم رؤيتها حين حملت على النعش .. حين سار الناس في جنازتها .. حين غابت عنا إلى الأبد ..
هنا سأترك الأبيات تتحدث عن نفسها لنقرأ بتمعن بعض ما كتبته لنا من صادق إحساسها الذي يجعلنا نستيقن من أننا فقدنا شاعرة من الصعب تعويضها لها بصمتها الخاصة بها في مسيرة الشعر الشعبي . قالت فأبدعت في مختلف أغراض الشعر بتلقائية كاملة وابداع متناهي . كان لها هاجسها الخاص بها . لم تقلد أحدا في استحضار أفكار قصائدها ولغتها ولهذا كان التميز :

أبكسر الاغلال واعيش حــره
بصنع قراري وكل شيٍ بيــدي
مليت من صبرٍ عطاني مـضره
أعيش في عصرٍ لجدّان جـدي

وبالطبع لم تقصد عابرة هنا الحرية البغيضة التي ينادي بها أنصار التغريب والدليل على ذلك أنها في حياتها العامة كانت في قمة المحافظة على ثوابتها وخصوصيتها كامرأة .
وأيضا تقول :


أهَلي يدرون اني شــــــــاعره
بس ما يدرون في جرح اللـيال
يمنعوني من كتابة خاطـــــــرة
ما درو اني من زمان بهالمجال
آه لو يـــــدرون اني (( عابره ))
عندهم بتــــــــصير موتتنا حلال

بالفعل فالبعض يعتبر أن ولوج المرأة مجال الكتابة والشعر أمر مرفوض جملة وتفصيلا خاصة اذا سعت لنشر ما تكتب .
وأيضا تقول :

وما دمت أنا متعافية ما زلت في سن الربيع
مهما يكن حجم العمل أرفض وجود الـخادمه


انها نظرة عابرة الاجتماعية التي تعكس رجاحة عقلها وشعورها الكامل بالمسئولية تجاه بيتها ومجتمعها الى درجة أنها ترفض الخادمة في وقت يفتخر فيه نساؤنا بوجود الخادمات .
وتقول أيضا :

يمه يا يمه فديتك لا تخـــــــــليـنـي
بعثرني الهم وابغا ايديك تجمعــنـي
يمه افهميني تراك ان ما فهمتينـي
ما فيه شخصٍ بهالدنيا بيسمعــني
ما عدت أنا طفلتك كبرت شوفـيني
خليك يمي ترى الاطماع تتبعـــــني
لا تدلليني ابي منك تدليــــــــــــني
وابي يدينك تداعبني وتصـــــــفعني


تحديد ولا أروع للعلاقة بين الفتاة وأمها . هنا ترسم عابرة ملامح هذه العلاقة بكل تفاصيلها بشكل فطري .
كل هذه الروائع من القصائد حملها ديوان عابرة سبيل الذي خلد لنا مرحلة من مراحل الشعر النسائي . سبعون قصيدة وأكثر بين دفتي هذا الديوان لا يمل من قراءتها .
توفيت الشاعرة عابرة سبيل ( أم فهد ) بعد رحلة مريرة مع الألم في دولة الكويت يوم الثلاثاء 15 / 1 / 1424هـ وعمرها 43عاما رحمها الله رحمة واسعة واسكنها فسيح جناته وألهم ذويها الصبر والسلوان.
رايت بأن أنقل لكم ماكتبته الشاعره حنين الشمال عن هذه الشاعره الفقيده
رحمك الله ياام فهد وتغمدك في فسيح جناته
تحياتي لكم جميعاً

قصيدة حنين الشمال التي وجهتها لعابرة سبيل وردها واللذان نشرا:



يا عابرة وانتي على قوس الاماني تمكثيــــــــــن
عشقك سبيل العابرات وحلم عابرة السبيـــــــل
في رحلتك ما مرك السلوان بين العابريــــــــــــن
ولا مرتك قسوة هل الفزعات والوقت البخيـــــــل
يا عابرة كان امس لي خطوة ولي حلمٍ حزيـــــن
واليوم خطوات الحزن تزاحمت نار وفتيــــــــــــــــل
طاولني المشوار الاول وآخر الجرح الدفيــــــــــــن
واذعنت للكف الشحيح وكل مشوارٍ طويــــــــــــل
كل الوجيه استاسدت والغافل استاق الفطيـــــن
واللي عليه العلم صار العلم من دونه ذليـــــــــــل
وام الفرزدق سلمت سره لشيخ العابثيـــــــــــــن
واصبح يسوم بضاعته باسط ذراعه والشلـــــــــيل
واليوم مال الناس سيره غير وش سوى الحسِين
وفي ديرة العميان للعوران صولات ومقـــــــــــــيـل
وانتي بلا ادنى شك لك هيبة ولك عقلٍ رزيــــــن
والناس صارت ما تميز فـالسمين من الهزيـــــــــل
واليوم يابنت العرب ما حول عربانك قطيـــــــــــــن
الصيف قاسي والموارد موحشه والدرب ويـــــــــل
هذا كلامي والذهينه تعشق الحرف الذهيــــــــن
والمعذره ترى الكلام احيان سيف بدون خيــــــــل

@@ حنين الشمال



الرد من عابرة سبيل رحمها الله :



لله ابشكي حيرتي لله رب العالميـــــــــــــــــــــن
وامد له كفي دعا يالله عفوك يا جـــــــــــــــــليل
يا منتهى الشكوى إله العابدين الصــــــــــــابرين
يالله عونك.فزعتك همي على قلبي ثقيـــــــــــل
جتني رساله نصّها يا عابره "حزن وانيـــــــــــــن"
مع "تجربه" مضمونها فيه النتايج والحصــــــــــــيل
في شكلها الظاهر غطا وفالباطن المعنى الدفين
وفي حبرها تلميح لا يمكن يصير المســــــــتحيل
وانا حقيقه ما عرفت شلون ببدي يا حنـــــــــــين
مدري ابدّي كلمتي او الزم الصمت الفضــــــــــيل
لا جيت ابتكلم لقيت الوضع قاسي مايلـــــــــــين
وان جيت ابسكت مالقيت علاج للقلب العلـــــيل
لكن عزايه ما معي سلطة ولا عندي ضمــــــــين
ولا اقدر اميّل ما عدل ولا أعدّل ما يمــــــــــــــيل
ما عندي الا كلمةٍ فيها العوارف خابريـــــــــــــن
القاع لا صارت دهر يا بدو يازين الرحيــــــــــــــــل
وخلافها "سلامتج" والله على الدنيا يعـــــــــــين
والصبر عنوانه فرج والغيث لابده يسيـــــــــــــــــل



@@ عابرة سبيل